In The Beginning богино хэмжээний кино

Богино хэмжээний киноны трейлер:

Төслийн танилцуулга:

“Ус авъя”

Хэдэн жилийн өмнө хэзээ ч үнэд орно гэж бодож байгаагүй олон зүйлсийг бид худалдаж авдаг болсон. Цэвэр агаарт байршилтай байр авахыг мөрөөдөж, олон айл ундандаа дэлгүүрээс ус худалдан авч хэрэглэж байна. Харин ихэнх хүмүүсийн хувьд энэ тансаг амьдрал мөрөөдөл төдий юм.

7 жилийн дараа Улаанбаатар хотын цэвэр усны нөөц дуусна гэдэг судалгаа байдаг. Бид ажиллаж олсон бүх цалингаараа зөвхөн ус авахын төлөө амьдрах болох тэр цаг үе ирээдүй биш өнөөдөр болоод байна.

Монгол Улсад дэлхийн дунджаас 3-4 дахин бага хур тунадас ордог, тархалт нь жигд бус, усны нөөц багатай. Манай орны нийт усны нөөцийн 1.9 хувийг бүрдүүлдэг газрын доорх усаар нийт усны хэрэгцээний 70 гаруй хувийг хангаж байна. Монгол Улсын өмнөд хэсэгт байрлах говьд сүүлийн жилүүдэд бороо орохгүй, цөлжилт ихээр явагдаж байна.

Тиймээс манай багийнхан “Эхлэл” хэмээх богино хэмжээний киногоороо цаг уурын өөрчлөлт, цөлжилт, ундны цэвэр усны нөөц дуусаж байгаатай холбоотой асуудлуудыг хөндөн гаргахыг зорьсон. Зарим хүнд уран сайхны, зөгнөлт кино мэт боловч харамсалтай нь өнөөдөр баримтат амьдрал тэнд байхыг кино багийнхан бид нүдээрээ үзлээ.

Говьд ганц гэрээрээ хэдэн тэмээ, ямаа маллан амьдардаг ганц бие бүсгүйчүүд олон бий. Тэд амьдрал ахуйгаа болгочихно, хүүхдээ өсгөнө, малаа маллана. Хэнээс ч юу ч гуйхгүй, өөрөө л болгохыг хичээнэ.

“Эхлэл” богино хэмжээний киноны гол дүрийн эмэгтэй тийм л ээж. Ээж, хүү 2-т хатсан худгаас нь дахиж ус гарч, сайхан амьдарна хэмээх итгэл бий. Өдөр бүр усны төлөө хөдөлмөрлөж ажиллана. Худаг ухаад, ухаад ус гарахгүй байгаа тул амны усны төлөө өөрт байгаа хамгийн үнэт зүйлээ золиосолж амьжиргаагаа залгуулна.

Энэхүү бүтээлдээ бороо ороогүй ган гачиг болсон говь, Марс гараг мэт хатсан амьдрал, эх хүүгийн хайр, малын амны ус нь арай гэж хүрдэг хэдэн тэмээ, зах хязгааргүй уудам нутгаа бодитоор нь харуулсан.