"УЛААНБААТАР ХОТЫН ДӨРВӨН УЛИРЛЫН ЦЭЦЭРЛЭГТ ХҮРЭЭЛЭН" ТӨСӨЛ

Жилийн дөрвөн улиралд Мөнх ногоон, Мөнхийн зунаараа байх, Технологи, ногоон байгууламжийн инноваци шингэсэн цогцолбор

Байршил: Улаанбаатар, Хан-Уул дүүрэг, Монгол Улс
Газрын хэмжээ: 4.0 га
Битүү барилгын дотор талбай: ~15,000 м²

Гадна ногоон байгууламж: ~25,000 м²
Уур амьсгал: −36°C хүртэл хүйтэн өвөл

"МӨНХ НОГООН ЦОГЦОЛБОР" төслийн санаа хэрхэн төрсөн бэ?

Та миний төслийн түүхийг уншихад ердөө 55 сек хангалттай. БАЯРЛАЛАА

Зарим том мөрөөдөл бизнесийн танхимд биш, зарим агуу төсөл хөрөнгө оруулагчдын ширээн дээр биш, харин энгийн нэгэн гэр бүлийн амьдрал дундаас, сэтгэлд үлдсэн жижигхэн мөчөөс эхэлдэг.

Манай МӨНХ НОГООГ ЦОГЦОЛБОР-/EVERGREEN COMPLEX/ төслийн түүх ч яг тийм.

Нэгэн өвлийн хүйтэн, шуургатай, бүрхэг амралтын өдөр байлаа. Гадаа жавар тачигнаж, гэрээс гарах аргагүй. Монголын олон мянган айл өрхийн адил бид ч гэртээ өнжив.

Гэр бүлээрээ тойрон сууж, халуун банштай цай идээд, хийх зүйлгүй мэт зурагтын суваг сольж, том жижиггүй гар утсаа оролдсон шиг сууцгааж байлаа.

Манай гэр бүл зургаан ам бүлтэй. Ах, эгч нар нь өрөө өрөөндөө орчихоод гар утас, дэлгэцнээс салахаа больсон. Нэг өрөөнд хамт байгаа хэрнээ нэг нэгнээсээ холдсон мэт. Харин манай хамгийн бага охин ой хүрч яваа бяцхан үр минь биднийг даган дуурайж, гар утас булаацалдан авч, богино хэмжээний бичлэгүүдийг хуруугаараа гүйлгэн үзэж байлаа.

Эхэндээ өхөөрдөм. Гэвч 20 гаруйхан минутын дараа нүд нь улайж, царай нь нэг л өөр болчихно.

Уйлаад эхлэхээр нь “түр ч гэсэн аргадаад авъя” гэж утсаа өгнө. Мэдсээр байж өгнө. Муу гэдгийг нь мэдсээр байж. Удалгүй утас булаалан, уйлаан болно.Ах эгч нар нь дүүтэйгээ тоглохгүй. Дүү нь ах эгч нараа дагаж дэлгэц ширтэнэ. Тэр мөчид би нэг л зүйл ойлгосон. Бид нэг гэрт байгаа хэрнээ хамт биш байжээ. Бид нэг нэгэндээ хайртай хэрнээ нэгнээсээ холдож байжээ.

Яг тэр үед зурагтаар Солонгос кино гарч байлаа. Битүү ногоон хүрээлэн дундуур залуу хосууд инээлдэн алхаж, амар тайван, аз жаргалтайгаар болзож байгаа хэсэг.

Тэр дүр зураг намайг нэг л хүчтэй цохисон. Би эхнэр рүүгээ хараад:

-“Ямар сайхан, амар тайван орчин бэ… Өвөл ингэж алхаж, амарч, гэр бүлээрээ цагийг өнгөрөөх ямар сайхан бол…” гэж хэлсэн.

Эхнэр инээмсэглээд:

— “Тийм шүү… Бид ч гэсэн хүүхдүүдтэйгээ ийм газар амармаар байна.” гэлээ.

Хэсэг чимээгүй сууснаа эхнэр над руу хараад:

— “Тэгвэл… ийм ногоон байгууламжийг өөрсдөө хийчихвэл яасан юм?” гэж асуусан. Тэр асуулт зүгээр нэг асуулт байгаагүй.

Тэр бол мөрөөдлийн эхлэл байсан.

Тэр агшинд би дотроо ассан.

Би шууд хэлсэн: “Яагаад болохгүй гэж? Яагаад Монголд ийм газар байж болохгүй гэж? Яагаад Монголын гэр бүлүүд, хайртай хүмүүс, хүүхдүүд, ахмадууд, өвлийн хүйтэнд ч ногоон хүрээлэн дунд алхаж, инээж, амарч, дурсамж бүтээж болохгүй гэж?” Тэр оройноос бид судалгаагаа эхлүүлсэн. Эхэндээ зүгээр л гэр бүлийнхээ төлөө байсан. Дараа нь ойлгосон энэ зөвхөн бидний мөрөөдөл биш юм байна. Энэ бол Монголын мянга мянган гэр бүлийн хүсэл юм байна.

Өвлийн улиралд хаашаа явахаа мэдэхгүй гэр бүлүүдэд, утаснаас хүүхдээ холдуулахыг хүссэн эцэг эхчүүдэд, болзох тайван орчин хайсан хосуудад, алхах, амрах дулаан ногоон орчин хүссэн ахмадуудад, спорт, соёл, боловсрол, амралт нэг дор цогцолсон шинэ орон зай хэрэгтэй байсан.

Тэгээд мөрөөдөл маань бидний МӨНХ НОГООН ЦОГЦОЛБОР болсон.

Жилийн дөрвөн улиралд МӨНХ ногооноороо байх, хүн бүхэнд нээлттэй, гэр бүл бүрт дурсамж бүтээх, Монголын анхныдөрвөн улирлын цэцэрлэгт хүрээлэн.

Энэ төсөл бол зүгээр нэг барилга биш.

-Энэ бол хүүхдүүд дэлгэцнээс салж, байгальтайгаа ойртох орон зай.

-Гэр бүлүүд дахин хамтдаа инээх орон зай.

-Хосууд дурсамжаа бүтээх орон зай.

-Ахмадууд амар тайван алхах орон зай.

Монголчууд өвлийг зөвхөн давах биш, мэдэрч, жаргаж, аз жаргалтай өнгөрөөх шинэ соёлын эхлэл. Дэлхийн том төслүүд асуудлыг шийдэхээр төрдөг.

Харин МӨНХ НОГООН ЦОГЦОЛБОР хүний сэтгэлээс төрсөн.

Нэгэн өвлийн өдөр, нэгэн гэр бүлийн ширээн дээрээс эхэлсэн энэ мөрөөдөл өнөөдөр Монголын ирээдүйн ногоон дурсамжийг бүтээх, том төсөл болон урагшилж байна.

“Нэг гэр бүлийн хүсэл—Нийт Монголын аз жаргалын төлөө" болсон.